ಬದುಕೆಂದರೆ ಒಂದು ನಿರಂತರ ಹೋರಾಟ

ಬದುಕು ಒಂದು ರಣಾಂಗಣ. ಇಲ್ಲಿ ಮನುಷ್ಯನಿಗೆ ಹೋರಾಟ ಹುಟ್ಟುಗುಣವಾಗಿರುತ್ತದೆ. ಬರೀ ಸುಖಾಪೇಕ್ಷೆ ಸ್ವಭಾವ ಜನ್ಯವಾದರೆ, ಕಷ್ಟ ಸಹಿಷ್ಣುತೆ ಅಭ್ಯಾಸವಾಗದಿದ್ದರೆ, ಸಾಹಸ ಪ್ರವೃತ್ತಿಯೇ ಇಲ್ಲವಾದರೆ, ಅವನ ಹುಟ್ಟುಗುಣಕ್ಕೇ ತಕ್ಕು ಹಿಡಿದಂತೆಯೆ. ಯಾಕೆಂದರೆ, ಮಗು ಹುಟ್ಟಿದ ಕೂಡಲೇ ಮೊದಲ ಉಸಿರೆಳೆದುಕೊಳ್ಳುತ್ತಾ ಬದುಕುವುದಕ್ಕೆ ಹೋರಾಟ ಆರಂಭಿಸುತ್ತದೆ, ಅದೇ ಹೋರಾಟದ ಮೂಲ ಸಹಜ ಗುಣ ಮನುಷ್ಯನಿಗೆ ಜೀವಮಾನದುದ್ದಕ್ಕೂ ಇರುತ್ತದೆ; ಇರಬೇಕಾಗುತ್ತದೆ.